Rom 3 | ATA | STEP | Lexe 'ilixo sou xooxoo ungasinge anu mii sou vasimengesi uasi, la sou ta Iutaia iuliuli noxi'a ane'i va'axu a loxovaa? Mo mii ma'ia laixe uxali no anu 'ilixo sou xooxoo ungasinge ne?

a 3:4Lex 51:4

b 3:9Rom 1:18–2:24, 3:23

c 3:10-12Lex 14:1-3, 53:1-3

d 3:13Lex 5:9, 140:3

e 3:14Lex 10:7

f 3:15-17Ais 59:7-8

g 3:18Lex 36:1

h 3:20Lex 143:2; Rom 7:7; Xal 2:16

i 3:22Xal 2:16

j 3:24Rom 5:1

k 3:29Rom 10:12

l 3:30Lap 6:4; Xal 3:20

m 3:31Mat 5:17

Romans 3

'Ilixo Masua Umomo sou Ua'ulixu 'Ilixo Laixe Uasi

1 Lexe 'ilixo sou xooxoo ungasinge anu mii sou vasimengesi uasi, la sou ta Iutaia iuliuli noxi'a ane'i va'axu a loxovaa? Mo mii ma'ia laixe uxali no anu 'ilixo sou xooxoo ungasinge ne? 2 Lataua mulosinge mimii iouiou lailaixe manina no anu vote'i iouiou. Tei manina la Anu mulosi'a ta Iutaia vaikala noxou mo mumuxaxu tanu noxi'a sou imulinu vaivaikala ne.

3 Ia se'i noxi'a ne ilavusou imulinu vaikala ne uasi. La sou a loxovaa noxi'a? Mo lexe ane'i imuxaxu tane'i uasi, la sou loxovaa no anu 'ilixo ne la ane'i imomomo sou i'oxonu Lataua sou umulinu vaikala noxou uasi, ne? 4 ^aUasisi manina! Ta mitema latala ne ta mitema sou kalavoi mukalusi, ia Lataua anusisi ne uvikala la uvikala maninasou utotomu. Aloxo kaukavu muai no nano no anu Lavuku Tavuna teinu noxou ne muvikala aloxo 'o.

“La sou no mine nini navivikala la ta mitema latala ne imaisou lexe
vaivaikala noxine ne maninasou no mine itulu no anu vaivaikala,
ia ane'i ixavutala sou isu'anu vaivaikala kalakalavoi se'i une'e noxine
la nini nauaulixa'a.”
5 Lexe susu noxinge uxalilixu 'ilixo mulapu noxou Lataua uxali lamana, la sou nenge tavikala a loxovaa? No mine Lataua ulosinge lakolisou susu noxinge, la Anu mu'oxonu 'ilixo masua ne? “Eni avivikala no anu xavutala noxi'a ta mitema aloxo 'o.” 6 Uasisi manina! Lexe Lataua umulinu 'ilixo mulapu utotomu uasi, la sou Anu umomomo sou utilovosi'a ta mitema laixe a loxovaa? 7 La sou no anu xavutala noxou itema la anu uxavutala aloxo 'o, “No mine eni asusu la Lataua uno'u uala tila, xo no anu susu noxilosi ne la sou 'ilixo mulapu noxou Lataua ne uxali uatu lamana. Lexe eni e'oxonu aloxo ne, ia loxovaa la sou anu u'oxo lexe eni amitema sou susu, la sou ulosilo lakolisou susu noxilo 'o?” 8 La sou anu aloxo 'o, nenge ta'oxo'oxonu susu mo sou no anu vote'i aloxo ne, la sou 'ilixo laixe uxali. Ta mitema mose'i ikalavoisixe, la ivikala lexe no anu a'alo noxixe la tevikala aloxo ne. Ta mitema e mivikala aloxo ne, ane'i me'a ino'u tu'umaxusou.

Itema Vile Ulapu no Iou Lataua Uasi

9 ^bLa sou nenge tavikala a loxovaa, nenge ta Iutaia temulinu 'ilixo laixe ia ane'i ta mitema va'axu uasi? Uasisi manina, la sou anu mumaxa'u lexe, nenge ta Iutaia mo ane'i ta Iutaia uasi, nenge ta mitema sou susu mukalusi. 10 ^cAnu aloxo kaukavu muai no nano no Lavuku Tavuna teinu muvikala aloxo 'o,

“Itema vile ulapu no iou Lataua uasi,
11 mo itema vile lavulavu noxou laixe uasi,
mo itema vile ukakamulinu Lataua uasi.
Itema vile aloxo ne uasisi manina.
12 Ane'i tavu'alo ne milai va'axu mukalu
la sou ane'i mukalusi ne mixali ta mitema ta masumasua mukalusi.
Vile noxi'a ulavusou u'oxonu 'ilixo laixe uasisi manina.”
13 ^d“Anaxa'a ne, mu'a'a loxo lulu anaxu a uxoxolu,
mo no anu vaivaikalai'a la ilavusou ikalakalavoi.”
“Mo anaxa'a ne mu'ana'ana no anu vaivaikala sou u'oxonu masuanu itema
loxo sinana veveeni lexaxu e u'oxone'i ta mimii la isoisoli.”
14 ^e“Mo vaivaikala e ulaa no anaxa'a ne sou vaikala masumasua
xe vaikala sou u'oxonu masuane'i ta menexi'asi sou ulosi'a tu'utu'umaxusi.”
15 ^f “Mo tava'a uiavelixa'a utotomu sou iave ilai ive'a ta mitema isoisoli.
16 Xe ilai aloxovaa ne ixalixu mamulosi
xe ilosi'a ane'i mose'i tu'utu'umaxu no anu maulixa'asi.
17 Mo ilavusou 'ilixo sou opo se'isisi 'o uasi,
18 ^gmo uxali uatu no ie'i ne, ilavusou i'umolu Lataua uasi.”
19 Vaimomo 'o nenge telavusou lexe vaivaikala e lapuloto mulelemolu ne, anu muvivikala noxi'a ane'i ane mixolu no laaxu lapuloto ne. Aloxo ne, mo sou itema vile umomomo sou uvikala lexe, “Eni amitema laixe,” uasi. Nenge ta mitema tavu'alo no lialia mukalusi 'o ne, nenge ta mitema sou susu no iou Lataua mukalusi. 20 ^hAloxo ne la sou no anu 'ilixo sou tamulinu lapuloto, la itema vile umomomo sou uvikala lexe eni elapu no iou Lataua. Uasisi manina. Lapuloto ne anu sou ulosienge sou susu noxinge.

Itema Umuxaxu Tanu Noxou Iesu La Anu Umoxo'u Lexe Itema Mulapu no Iou Lataua

21 Ia vaimomo 'o 'ilixo e Lataua mu'oxonu sou mumoxoinge lexe nenge ta mitema telapu no iou Lataua ne a muxali lamana mukalu. Anu uxali no anu vote'i sou tamulinu lapuloto uasi, anu muxali no anu vote'i vilemo. Vaikala muai no anu lapuloto noxou Mosesi mo lavuku noxi'a ta mitema sou palomatana milemolu 'ilixo ma'ia Lataua mu'oxonu. 22 ⁱ'Ilixo ne aloxo 'o, ta mitema ukalusi e imuxaxu tane'i noxou Iesu Kalisito, la Lataua umoxo'a lexe ane'i ta mitema milapu no iou, ia no anu vote'i vile la uasi. 23 Xo nenge ta mitema latala ne tesusu mukalusi mo tamomomo sou nenge'a Lataua taxolu tapita mo ta'itinu Lataua ualasou teitexi no opo loxotolo uasi. 24 ^jIa Lataua mualaunasinge laixe, la sou no anu xaixai noxou Kalisito Iesu la Anu muno'inge telivu, la sou Lataua mumoxo'inge lexe nenge ta mitema telapu no iou. Nenge texali ta mitema mulapu no iou Lataua ne no anu xaixai e nenge menge ta'oxonu uasi, Lataua mulosinge vitanisi no anu xaixai noxou Kalisito Iesu. 25 Lataua mukalanu 'Olu Iesu mulu'e musoli, la sou sialuxu munixi sou muxexeenu susu noxi'a ta mitema ane'i ane mimuxaxu tane'i no anu soli noxou Iesu. Anu mu'oxonu aloxo ne sou mumaxa'u lamana 'ilixo e Anu mu'oxonu sou mumoxo'inge lexe nenge ta mitema telapu. Xo tei, la ta mitema isusu, ia Lataua la'iaxu mo ukolinu susu noxi'a ne palea uasi, Anu muxolu iou muvaxai'asi. 26 Ia vaimomo 'o Lataua mulosienge lexe Anusisi anu mulapu. La sou ane'i mukalusi ane mimuxaxu tane'i noxou Iesu la Lataua umoxo'a lexe ane'i milapu. 27 La sou nenge ta'itinenge no anu mii ma'ia? Mii vile sou nenge ta'itinenge no anu uasi. Mo tava'u aloxovaa la sou nenge ta'itinenge 'o? Xo nenge te'oxo xaixai laixe? Uasi. Ia no anu 'ilixo sou tamulaxu tanengesi. 28 La sou vaimomo 'o nenge telavusou lexe, itema vile umomomo sou uxali itema mulapu no iou Lataua no anu vote'i sou umulinu mii ma'ia ane lapuloto muvikalanu sou umulinu uasi, no anu vote'i sou tamulaxu tanengesi. 29 ^kIa loxovaa, Lataua ne Anu Lataua noxi'a ta Iutaiasi? Loxovaa anu Lataua noxi'a ane'i ane ta Iutaia uasi kalumo uasi? Uasi, anu Lataua noxi'a ane'i ta Iutaia uasi kalumo. 30 ^lAloxo ne la sou anu Lataua vilesisi, la sou ane'i ane xooxoo mungasi'a imuxaxu tane'i noxou Iesu la Anu umoxo'a lexe ane'i ane ne ta mitema milapu. Anu iou vilesisi aloxo ne noxi'a ane'i ane xooxoo ungasi'a uasi kalumo. 31 ^mLa sou nenge tavikala lexe 'ilixo sou tamulaxu tanenge ne anu mii tila ne? Ia loxovaa lapuloto anu uxali mii vitanisi ne? Uasisi manina! Laixe lexe nenge tatetelisou lapuloto pekia'u kalumo.